Денеска е неработен ден и за православните христијани и за муслиманите. 6 јуни во православието е Задушница, а во исламот е првиот ден од Курбан Бајрам.
Задушница
Православните христијани денеска и утре го празнуваат празникот Задушница кој му претстои на Духовден во недела. Празникот Духовден секогаш се слави 10 дена по Спасовден, а 50 дена по Велигден, а пред него православните христијани го одбележуваат празникот Задушница.
За Задушница во црквата се служи парастос, а по службата верниците се упатуваат на гробовите на најблиските, палат свеќа, читаат молитва и принесуваат жртва за спасение на починатите (леб, пченица и вино).
Свештеникот кажува посебна молитва која се нарекува и Трисагија во чест на починатите.
На Задушница луѓето ги посетуваат гробовите на блиските и помеѓу себе си раздаваат храна притоа споменувајќи ги упокоените за спас на нивните души.
Курбан Бајрам
Овој исламски празник уште се нарекува и празник на жртвата затоа што тогаш се принесува жртва – курбан, обично овни и им се делат на сиромасите.
Овој голем празник се слави четири дена.
На првиот ден од празникот се изведува молитвата за Бајрам – бајрам намаз, со која верниците бараат милост од Алах. Карактеристично за овој празник е принесувањето жртва – курбан која има симболика на приближување кон Бога. Обичајот го изведуваат сите кои имаат можност за тоа. Оние кои принеле жртва, потоа раздаваат од месото на сиромашните, соседите и роднините. На овој ден се крунисува аџилакот на аџиите кои отишле да се поклонат на Светата Ќаба во Мека.