На маргините на Самитот ЕУ-Западен Балкан во Брдо кај Крањ, Словенија, претседателот на Владата на Република Северна Македонија Зоран Заев оствари билатерална средба со неговата колешка од Естонија Каја Калис, на која, како што информира владината Прес-служба, биле истакнати пријателските односи меѓу двете земји и взаемната посветеност за понатамошно унапредување на соработката.
Заев, се вели во соопштението, во разговорот ја поздрави заложбата на Естонија како вреден партнер и поддржувач на нашата интеграција во Европската Унија, како и во процесот на зачленување на Северна Македонија во НАТО и се заблагодари за силната и гласна поддршка за започнување преговори за пристапување.
– Заеднички заклучок од средбата на премиерот Заев со премиерката Калис е дека Самитот на ЕУ за Западен Балкан треба да испрати посилни пораки до граѓаните за поддршка за аспирациите на земјите од регионот за пристапување во Европската Унија, се вели во соопштението.
Заев, исто така, се заблагодарил за прифатената поддршка на Естонија за споделување на своето искуство од дигитализацијата со Северна Македонија, за што двете земји го одобрија склучувањето на Меморандум за разбирање меѓу Секретаријатот за европски прашања и Естонскиот центар за меѓународен развој во областа на дигитализацијата и е-управување.