На колегата Кирил Петков му го честитав изборот за претседател на Министерскиот совет на Република Бугарија.
Во телефонскиот разговор на премиерот Петков му посакав успешен мандат и остварување на сите приоритети утврдени во програмата на неговата Влада, а со цел добробит и просперитет на бугарската држава и бугарските граѓани.
Во разговорот изразивме подготвеност да ја забрзаме нашата комуникација и соработка низ повеќе работни групи во областите на економијата, културата, здравството, енергетиката, инфраструктурата и други области од интерес на македонските и на бугарските граѓани.
Се согласивме да продолжиме да работиме на изнаоѓање прифатливо решение за деблокирање на постапката за почеток на преговорите за членство на Северна Македонија во ЕУ и за нов позитивен импулс за зајакнување на билатералните односи меѓу нашите две земји, во име на заедничката европска иднина, напиша Заев на Фејсбук.
Од своја страна, Кирил Петков во интервју за „Фајненшл Тајмс“ вели дека ќе предложи „нова процедура во односите со Северна Македонија, многу брза, со многу краток краен рок од само 6 месеци и дека ќе ги постави преговорите на нови основи. „Ќе користиме работни групи кои што ќе најдат решенија по прашања како заедничка економска активност, инфраструктура, култура и историја“, изјавил Петков за угледниот Британски неделник но и дека „не може да гарантира дека двостраните проблеми ќе бидат решени“.
Интервјуто на Петков во „Фајненшл Тајмс“ излезе со насловот: „Новиот бугарски премиер се обврзува на пресврт во врска со ЕУ амбициите на Северна Македонија“.