Преземени се активности за усогласување на домашното законодовство со прописите на Европската унија во областа на воздухопловството и унапредени се оперативните и техничките капацитети на Агенцијата за цивилно воздухопловство, преку твининг лајт проектот „Поддршка за учество во ЕЗВО-Европска заедничка воздухопловна област“, што беше заокружен денеска со онлајн конференција.
Целта на проектот, финансиран од ЕУ, што го спроведе Хрватската агенција за цивилно воздухопловство со Агенцијата за цивилно воздухопловство на Република Северна Македонија, како твининг партнер, беше да се поддржи развојот на цивилното воздухопловство во државава во согласност со меѓународните стандарди и acquis на ЕУ во областа на воздухопловството.
-И покрај предизвиците предизвикани во текот на проектот од пандемијата на вирусот КОВИД-19 и двата партнера изразија голема посветеност и флексибилност во прилагодувањето на „новата реалност“. Резултат на тоа беше успешното спроведување на проектот и постигнувањето на сите планирани цели и резултати, велат од АЦВ.
-Усогласување на регулаторната рамка за примена на важечките стандарди во областа на летечки операции, пловидбеност, лиценцирање на персонал и аеродроми со Меѓународната организација за цивилно воздухопловство и acquis на ЕУ; зајакнување на оперативниот капацитет на АЦВ за спроведување на Регулативите на ЕУ во областа на пловидбеност, лиценцирање на персоналот, летечки операции и аеродроми преку развој на соодветни работни процедури и упатства, како и зајакнување на техничкиот капацитет на раководителите, инспекторите и административниот персонал со цел да се исполнат безбедносните услови на ИКАО и ЕУ, се постигнатите резултати во трите компоенти од проектот.
Постигнати резултати ги претставија лидерите на проектот од Хрватска, Златко Ширац и од државава Маја Васкова-Ќулавковска, кои ја истакнаа и важноста за зачувување на неговата одржливоста потврдувајќи ја организациската одговорност и на двата партнера, постигнатите резултати и придобивки да останат вградени во македонскиот систем за цивилно воздухопловство.
Во име на Стефен Худолин, шефот за соработка на Делегацијата на ЕУ во Република Северна Македонија, на конференцијата се обрати Мануела Манолис која ја нагласи важноста на меѓусебната соработка помеѓу ЕУ и државава во однос на продлабочување на интеграциските процеси и олеснувањето на приближувањето на регулаторните и оперативните рамки во областа на воздухопловството.
Вонредната и ополномоштена амбасадорка на Република Хрватска во државава Нивес Тигањ, пак, порача дека овој успешно спроведен проект претставува афирмација на професионалните способности на Република Хрватска за постојана поддршка на напорите на земјата корисничка на европскиот пат, додека директорот на Агенцијата за цивилно воздухопловство Томислав Тунтев изрази голема благодарност на Европската Унија и Хрватската агенција, како двигатели на напредокот и одржливоста на македонското цивилно воздухопловство.
Со проектот, што започна во ноември 2019 година, на Хрватската агенција за цивилно воздухопловство ѝ беа доделени 250 000 евра од фондовите на ЕУ.