Во Црна Гора заврши 12-от натпревар во лежење што традиционално го организира „Eтно село Монтенегро“ во Брезна. Првото место го освои Жарко Пејановиќ од Подгорица кој лежеше приближно 55 часа.
„Не беше тешко. Верувајте, не се ни „загреав“. Но, не сакав да одам на рекорд. Тоа ќе го направам следната година, за кога е планиран натпреварот на кој ќе учествуваат сите досегашни победници“, изјави тој за медиумите.
На натпреварот оваа година учествуваа девет натпреварувачи, а последни останаа Пејановиќ и Вук Кољеншиќ од Даниловград.
Како што неофицијално беше соопштено, имало преговори и за поделба на титулата, но Пејановиќ бил решен да го освои првото место и наградата од 350 евра.
Рекордот го држи Дубравка Алексиќ, исто така, од Подгорица, која лани лежеше 117 часа.