По маратонската седница на Советот на општина Центар која почна вчера во 13 часот, а заврши утрово во 8, градоначалникот Андреј Жерновски денеска обвинува дека власта ја опструира работата на општина Центар. Реферирајќи на огромниот број амандмани кои советничката група на ВМРО ДПМНЕ ќе ги поднесе за буџетот на општината, Жерновски изјави дека сето тоа ќе оди на голема штета на граѓаните.
-Веќе сериозно можам да обвинам дека намерата на владејачката гарнитура е да се блокира работата на општина Центар, а тоа ќе биде на штета на граѓаните. Општина Центар без ребаланс, без буџет нема да може да работи, вели градоначалникот на општина Центар.
Жерновски повика на конструктивност за следната седницата на Советот треба да продолжи во четврток во 10 часот. Тој уште еднаш објасни дека намерите на општината не се да руши со измените во Деталниот урбанистички парк, туку да го сочува она зеленило што преостана во општината, а чие уништување се планира во име на бизнис интереси.
-Ние бараме да се укине новиот и да се врати стариот ДУП. И таму, во стариот црквата ја има, значи повторувам црква ќе и нема да се руши. Се надевам ќе има разбирање и не можам повеќе да сфатам за што се протестите, вели Жерновски.
-Сакам општината да се врати на граѓаните, сакам да функционира законот, сакам да престане трајното оттуѓување на јавните површини кои што им припаѓаат на граѓаните и ќе се борам до крај, веќе се бројат часовите кога ќе започне да се гради и на она мало парче зеленило што остана помеѓу хотел Бристол и Рамстор, на сечење дрвја за градење на една неразумно висока повеќекатница, сакам да го спречам проектот затоа што не можам да разберам што ќе е една катна гаража во централниот дел на паркот. Добив доверба од граѓаните за ова, но тоа не значи дека сакам да го рушам тоа што е направено досега.
Жерновски обвини дека власта постојано ја опструира работата на општината, а вчера за време на демонстрациите во општина повторно дошла управна инспекција.
-Не можам да разберам зошто општината е буквално нападната и опседната. Се надевам дека полицијата нема да дозволи да се нападнат оние кои работат во советот. Ова е слика за демократијата во Република Македонија, не станува збор за имиџот на општината и ова не е битка за ДУП-овите и ГУП-овите туку за демократијата и како власта ја разбира таа демократија. Стравувам дека овие случувања ќе се одразат негативно и на извештајот за Македонија од ЕУ.