Македонското и српското здружение на новинари работат на тоа, новинарот Зоран Божиновски да не биде екстрадиран во Македонија. Тие сметаат дека не може да има екстрадиција, во ситуација кога нема обвинение за случајот. Два месеца по апсењето, Судот во Нови Сад се уште ги собира доказите и не одлучил дали новинарот Божиновски ќе и биде испорачан на Македонија.
-Чудно е што се бара екстрадиција, а нема обвинение. Згора на тоа, неубедливо е да се обвинува новинар за шпионажа, кога она што го пишувал било во рамките на неговите работни обврски. Се плашам дали воопшто судењето ќе биде правично и објективно во ситуација кога судот работи зад затворени врати, изјави за НОВА Насер Селмани претседател на ЗНМ.
Српскиот суд пред Нова година го продолжи притворот на Божиновски за нови 60 дена.
Судот ја чека документацијата од Македонија која сега била дадена на превод. Во меѓувреме
Божиновски побара политички азил во Србија. За семејството пак, оваа документација за која велат дека се засновала само на сослушувани сведоци, воопшто не е убедлива бидејќи немало материјални докази.
Неговата ќерка Ана утринава го посетила Божиновски во истражниот затвор и вели дека тој се чувствува добро, дека вербата не го напушта. Таа тврди дека татко и има голема подршка од српското здружение на новинари, а од ЗНМ воопшто не им се јавиле.
Ана Божиновска за НОВА изјави дека порталот ИН4С од Подгорица, каде што Божиновски е соработник го предложил за награда за животно дело во српското здружение на новинари.
На петицијата за негово ослободување во Србија досега има собрано 10 000 потписи.
-Немаме информација дали ќе биде екстрадиран, но ние се надеваме дека татко ми нема да и биде испорачан на Македонија, изјави во телефонски разговор за НОВА, Ана Божиновска.
За Божиновски МВР распиша меѓународна потерница за случајот Шпион, но јавното обвинителство ја прекина постапката, со образложение дека таа ќе продолжи откако ќе биде донесен во Македонија.
-Ќе направиме се Божиновски да не биде екстрадиран во Македонија. Како што застанавме зад новинарот Кежаровски, така работиме и за случајот на Божиновски. Веќе имавме средби со претставници на неколку институции кои што можат да имаат влијание, вели Селмани.
Според него, со случаите на Кежаровски и Божиновски притисокот врз новинарите е очигледен, а пораката е јасна бидејќи станува збор за новинари кои работеле осетлива проблематика во секторот, со полицијата.