Од:

Анонимна галерија со повици за линч на амбасадорите кружи на интернет

На социјалните мрежи од утрово кружи галерија од креирани фотографии на повеќе амбасадори во Македонија, како и други странски дипломати во кои што тие се поставени во комеморативни рамки со црни ленти и погребни свеќи.

Галеријата е креирана анонимно, а индиректно повикува на линч на амбасадорите во оваа земја. Тука се амбасадорите на САД, Германија, Франција, Велика Британија, Италија, ЕУ, како и поранешниот медијатор во пржинскиот договор Питер Ван Хојте и европратеникот Ричард Ховит.

Амбиентот на говор на омраза и повици за отстранување на дел од амбасадорите од земјите на ЕУ и НАТО кои беа вклучени во изнаоѓања решенија за политичката криза во земјава повеќе од две години е присутен на социјалните мрежи и во дел од провладините медиуми, особено порталите. Но по предвремените парламентарни избори за време на протестите на поддржувачите на ВМРО-ДПМНЕ  кои се случуваа изминатите неколку дена, атмосферата на омраза кон странските претставници во земјава ја „зовреа“ и функционери на оваа партија.

Од говор пред Државната изборна комисија (ДИК), прв на амбасадорот на САД, Џес Бејли, во четвртокот навечер минатата недела суптилно му се закани директорот на Државниот архив Филип Петровски. Состојбите кулминираа завчера со донесениот проглас на Извршниот комитет на ВМРО – ДПМНЕ којшто беше читан од страна на претседателот Никола Груевски пред насобраната толпа во којшто тој директно им се обрати на странските амбасадори во говор кој беше оценет како заплашувачки.

 

Поддржувачи на ВМРО-ДПМНЕ носат транспарент на протестот пред ДИК

Претходно, наставничка од основното училиште во Битола носеше погребен крст со името на лидерот на опозицијата Зоран Заев.

Заев доби и индиректни закани и од лидерот на ВМРО-ДПМНЕ, Никола Груевски, кој на говор во Делчево жалеше што Ќосето, инаку озлогласен убиец во историјата на ВМРО, не е жив:

“Да беше Делчев денеска жив, тој немаше да може со него да се поздрави, на него ќе му беше пратен само Ќосето да ја заврши приказната со таков човек- му порача Груевски на Заев”, изјави Груевски.

За време на изборната кампања, Граѓанско движење за одбрана на Македонија (ГДОМ) во кое членуваат директорот на Театарот за деца и младинци, Братислав Димитров, професорката Виолета Ачковска, актерот Крсте  Јовановски, Миленко Неделковски и други, делеа памфлети со списоци каде што новинари и невладини организации беа етикетирани како непријатели на државата.

 



Comments are closed.