Отежнато и многу споро е движењето на автопатот Скопје-Велес поради врнежите од снег, но и излизгани возила на патот.
Граѓаните на социјалните мрежи се жалат дека се заглавени во огромна колона со возила, како и дека снегот недоволно или воопшто не е исчистен.
„Се движиме многу споро, но повеќе стоиме во место. Најдобро е воопшто да не тргаат оние кои сакаат да одат накај Велес или кон Скопје, има и излизгани возила од снежните наноси“, ни изјави една граѓанка која во моментот е во возило на автопатот.
Освен за Скопје – Велес, жалби има дека и патиштата од Кичево до Охрид и Скопје-Тетово, исто така не се чистат од снегот.
Од АМСМ вечерва соопштија дека сообраќајот на патните правци Скопје – Велес и Велес – Скопје е во прекин за сите видови на возила, поради излизгани и попречени возила.
„Од 19:30 часот на патните правци Кавадарци – Неготино и Охрид – Ресен кај превој Буково поради превртени тешки моторни возила, сообраќајот е во целосен прекин.
Поради врнежи од снег, забрани за движење на тешки товарни возила има на патните правци: крак Маврово – Дебар, Гостивар – Кичево преку планинскиот премин Стража, Кичево – Охрид преку планинскиот премин Пресека и на патниот правец Крива Паланка – г. п. Деве Баир“, се вели во нивното соопштение.
Сообраќајот на државните патишта се одвива во зимски услови, по влажни коловози, а во западниот и северниот дел од државата, на места со остатоци од снег по интервенција на екипите на Македонија пат.
„Во клисурите и засеците можна е појава на помали одрони, особено на патните правци: Кочани – М.Каменица – Делчево, Виница – Берово, Гостивар – Стража, Маврово-Дебар-Струга, Д.Капија – Удово, Катланово-Велес, Крушево – Демир Хисар и Ресен-Буково“, предупредуваат оттаму.
Интензитетот на сообраќај на патните правци надвор од градските средини е умерен. На граничните премини нема подолги задржувања за влез и за излез од државата.
Од АМСМ препорачуваат исклучително внимателно возење, прилагодена брзина на движење и почитување на поставената сообраќајна сигнализација.