Пишуваат: Сашка Цветковска и Владо Апостолов
НОВА ви претставува профил на „Влатко“ или личноста со која судијката од Управниот суд, Светлана Костовска договара што да стои како основ за да легнат парите од договорените провизии утврдени во разговорите со директорот на УБК Сашо Мијалков, како што тврди лидерот на СДСМ Зоран Заев.
Во транскриптите коишто опозицијата ги доставува до медиумите, „Влатко“ е напишан како Влатко Стајковиќ, а во еден од телефонските снимки помеѓу Костовска и израелскиот посредник, таа ја споменува фирмата НВСП како фирма на којашто сметка би требало да легнат средствата, а со Влатко се договара со каква назнака би легнале истите.
НВСП, според досегашните објавени истражувања на базата за медиумска сопственост „Медиапедија“ е компанија којашто се занимава со различни дејности – од консултантски и адвокатски услуги, обезбедување на резиденции, дистрибуција на мобилни телефони, дозвола за промет со оружје и со муниција, медиуми и друго. Сопственик на НВСП е Владислав Стајковиќ.
Според евиденцијата на Централниот регистер на Македонија, компанијата НВСП е сопственик на Радиото Слободна Македонија во кое што свои емисии имаат Миленко Неделковски, новинарките на Сител телевизија Славица Арсова и Наташа Мерсовска, професорката на правниот факултет Татјана Каракамишева, екс-вицепремиерот за евроинтеграции Ивица Боцевски и други новинари и експерти кои што во јавноста важат за блиски до владејачката ВМРО ДПМНЕ. Радио Слободна Македонија има седиште на иста адреса со неделникот и портал „Република“, чијшто газда е фирмата „Ирезине Лимитед“ од државата Белизе.
Фирмата НВСП ја поседува и телевизијата К3 (поранешен „Златен канал“) од Куманово. НВСП е формирана во 2006 година. Стајковиќ, покрај тоа што е основач на НВСП, тој е и директор на фирмата „Мобико“, каде што сопственик е извршниот директор на Т-Мобиле, Жарко Луковски.
Луковски, пак, приватно е близок пријател, а од неодамна и кумашин на директорот на Управата за безбедност и контраразузнавање (УБК), Сашо Мијалков. Шефот на тајната полиција беше кум на свадбата на Луковски со неговата избраничка годинава.
Стајковиќ, исто така, е и член на Надзорниот управен одбор на Државна видео-лотарија, новата заедничка фирма на македонската Државна лотарија и на австриската „Касинос Аустриа“, преку која ќе се организира видeо-лотаријата што неодамна ја најави Владата. НОВА пишуваше за овој случај, каде што откривме дека доминантен сопственик на „Касинос Аустриа“ е, всушност, офшор-компанија од Лугано, Швајцарија.
Владислав Стајковиќ, преку НВСП, бил и првиот газда на фирмата за обезбедување имот и лица, популарната СГС, но и прв газда и на скопската компанија „Финзи“, која денес под свое го има Нетпрес, еден од најгласните провладини медиуми.
5. Разговор на Светлана Костова со Влатко Стојковиќ
ВС: Ало?
СК: Ало Влатче?
ВС: Еј, повели.
СК: Заборавив вчера да те прашам…
ВС: Ајде.
СК: Да не има нешто ново во однос на плаќањето?
ВС: Е па денеска ќе провериме, мислам дека ќе, би требало да стигне имаме најава и да видиме ако може утре или задутре да исплатиме.
СК: Сето да го завршите. Добро оти…
ВС: Ама мислам дека….
СК: Ние имаме состанок со директорот, затоа.
ВС:…далеку е од све. Мислам дека уште 100-че фали.
СК: Пак ќе фали, а?
ВС: Не, не уште 100-ка фали, не се стигнати или 90…
СК: Овие, овие што ќе стигнат пак ќе фали?
ВС: Е не, ја ги очекувам тие дали се стигнати. Значи уште тие 90 последните.
СК: Ако стигнат тие може да се затвори авансот конечно.
ВС: Да, да, да. Ако не е стигнат исто ја ќе пробам евентуално со мои нешто да убацам некои динар, за да затворам. Ваљда они ќе ги пуштат сите.
СК: Не јас ќе се видам денеска секако со директорот, значи така е договорено…
ВС: Кажи му така, молим те. И она поразговарај го конечно зошто јас се чув со него…
СК: Да де да, еве го јас правам нешто, не ставам и тука нешто, знаеш како нешто измислив, ама…ќе ти кажам, само првин директорот да го види.
ВС: Види ако може, можеш и да ме викнеш, не е проблем никаков.
СК: Не, не овде ставив amount of the donation will be толку и толку which is include или така нешто, кое е вклучено expenses and provision for the така нешто ќе биде.
ВС: Може, може.
СК: Така нешто, ќе го прашам само директорот и така ќе го ставиме.
ВС: Мора да стои за да знаеме…
СК: Мене ми е уште го немам видено да знаеш.
ВС: Ако, ако.
СК: Само ми прати порака дека денеска ќе се видиме..
ВС: И мене вчера ми рече дека ќе ме викне, ама
СК: Не, не денеска мора да ме види, имаме состанок…
ВС: Важи. Здравје
СК: Мислам дека ќе се видиме.
ВС: Важи. Ако Ви требам, свртите, иако јас ќе бидам денеска со некои гости ама…
СК: Не е страшно. Сакав да бидам сигурна што имаме до крај.
ВС: Важи. Супер се гледаме, чао.
СК: Важи, чао.