Софија: Три лица се обвинети, а едно лице се бара откако бугарската полиција откри плантажа со канабис во 20 подземни галерии во стар рудник за цинк, објавија официјалните лица.
Заменик-директорот на Генералната дирекција за борба против организираниот криминал, Емил Борисов, изјави дека досега се запленети околу 70 килограми дрога, 600.000 евра во готово и 600 парчиња муниција, објави Ројтерс.
„Поранешниот рудник бил опремен со високотехнолошка инфраструктура и веројатно се користел за производство на големо наменето за шверц во странство“, рече Борисов.
За време на брифингот, заменик-градскиот обвинител Вихар Михаилов истакна дека во рудникот има повеќе од 20 галерии (тунели) и дека сопственикот не е меѓу обвинетите.
На брифингот беа споделени фотографии кои покажуваат дека некои галерии се претворени во оранжерии, а други во живеалишта, кујни, простории за одржување и друго.
„Ова е подземен град со објекти. Истрагата е во тек и веројатно ќе трае со месеци. Очекуваме помош од разни организации, експерти за рударство, изјави за медиумите заменик-директорот на Дирекцијата за рударство и минерални ресурси Дарин Костов.
Пред неколку дена, софискиот суд објави дека двајца осомничени се во притвор, едниот е во домашен притвор, додека потрагата по четвртиот е во тек, пишува бугарскиот портал 24 Часа.
Едниот од нив е обвинет за поседување дрога за дистрибуција во вкупна количина од 67 килограми и 340 грама, другиот за перење пари и нелегално поседување муниција за огнено оружје, додека сите четворица се обвинети за кривично дело заговор.