По ненадејното заминување на персоналот на Амбасадата на Србија од Скопје вчера, а во отсуство на официјални информации, една од шпекулациите беше дека причина е што Македонија наводно ќе биде предлагач за гласањето за влез на Косово во УНЕСКО.
Но оваа информација уште пред денешните изјави на српските функционери ја демантира вршителот на должноста шеф на косовската дипломатија Емануел Демај минатата недела кога изјави дека Косово годинава воопшто не аплицирало за прием во УНЕСКО.
Според него, апликацијата не е поднесена поради „домашни прашања“, односно затоа што се уште не се донесени законите за верски слободи и за културно наследство.
– Косово се уште не аплцираше во УНЕСКО. Во очекување сме на донесување на Законот за верски слободи и на Законот за релгиско наследство, кои се уште не се донесени. Работиме, ги разгледуваме сите можности и опции, верувам дека имаме уште малку време за да аплцираме. Ќе видиме како ќе се одвиваат работите, изјави Демај за „Економија онлајн“.
Тој оцени дека неконституирањето на косовското Собрание ќе го попречи усвојувањето на двата закони, што ќе значи дека Косово веројатно не ќе може да аплицира за членство во УНЕСКО годинава.
Во ноември 2015 година на Косово му недостигаа само три гласа за да стане членка на УНЕСКО. Членството во оваа најголема организација на ОН треба да го одобрат две третини од 195-те земји членки.