Денеска навршуваат 12 години од потпишувањето на Рамковниот договор со кој се стави крај на воениот конфликт во Македонија во 2001 година и се постави рамка за меѓуетнички соживот.
На 13 август 2001 година, во претседателската резиденција на Водно во Скопје, Рамковниот договор го потпишаа тогашните функционери: претседателот Борис Трајковски, лидерот на ВМРО-ДПМНЕ и премиер Љупчо Георгиевски, лидерите на ПДП Имер Имери, на СДСМ Бранко Црвенковски и на ДПА Арбен Џафери.
Потписници на договорот, во својство на гаранти, беа и специјалните претставници на ЕУ и САД, Франсоа Леотар и Џејмс Пердју, кои учествуваа во преговорите.
Преговорите за Охридскиот рамковен договор се одвиваа во Вилата „Билјана“ во Охрид во јули и во август 2001 година, и во нив покрај потписниците учествуваа и Хавиер Солана, висок претставник на ЕУ за безбедносна и надворешна политика и Питер Фејт, претставник на САД, како и повеќе експерти меѓу кои еминентите професори на Правниот факултет во Скопје, Владо Поповски и Љубомир Фрчковски.