Во сириската граѓанска војна досега животот го загубиле речиси 126.000 лица, соопшти денеска сириската Опсерваторија за човекови права, невладина про-опозициска организација со седиште во Лондон.
Групата, која се повикува на мрежа активисти, адвокати и лекари на терен во Сирија, наведува дека до 1 декември бројот на регистрирани жртви изнесува 125.835 лица.
Меѓу жртвите 44.381 се цивили, од кои 6,627 деца и 4.454 жени.
Според податоците на Опсерваторијата убиени се 27.746 опозициски борци, од кои над 19.000 се сириски цивили што земале оружје да се борат против режимот на претседателот Башар ал Асад.
Меѓу опозициските жртви има 2.221 воен дезертер и 6.262 не-Сиријци, кои се приклучиле на бунтовниците.
На страната на режимот убиени се 50.927 лица, речиси двојно повеќе отколку жртвите кај опозициските сили.
Меѓу жртвите кои се борат на страна на сириската влада се 31.174 војници и 19.256 припадници на провладините милиции.
Организацијата, исто така, регистрирала 2.781 неидентификувана жртва. Крвавиот конфликт во Сирија почна во март 2011 година.
ИЗВОР: МИА