Во Македонија денеска се одбележува 141. година од раѓањето на еден од најголемите македонски револуционери Гоце Делчев. По тој повод во организација на меѓународната манифестација „Гоцеви денови“, на неговиот гроб во црквата „Св. Спас“ во Скопје, Македонската православна црква одржа литургија.
Цвеќе положија државна делегација, делегација на Собранието, како и делегација на Град Скопје, претставници на АРМ, на образовни институции, политички партии, општини, установи и здруженија именувани по Гоце Делчев.
Во состав на владината делегација беа вицепремиерот и министер за финансии Зоран Ставрески и министрите за внатрешни работи и за труд и социјална политика, Гордана Јанкулоска и Спиро Ристовски.
Час подоцна, пред споменикот на Гоце Делчев на плоштадот „Македонија“ цвеќе положија делегација на Собранието, владина делегација во чиј состав беа вицепремиерот за економски прашања Владимир Пешевски и министрите за култура и за информатичко општество и јавна администрација Елизабета Канческа-Милевска и Иво Ивановски, од Кабинетот на претседателот на Република Македонија, и општина Центар.