Претседателот на СДСМ Венко Филипче на обраќањето на денешниот 31 Конгрес на партијата, ја обвини власта како што рече, дека „ја турнала Македонија во дипломатска изолација“. Според него, политиката која се води ја врзува Македонија за антиевропски и проруски центри на моќ, со сериозни последици по иднината и безбедноста на државата.
Македонија е во дипломатска изолација. Европскиот пат е блокиран а тие немаат план. Европа не отпиша, Америка не нè запишува. Наместо во периметарот на САД со Мицкоски завршивме надвор од кружницата наречена Европа. Вакво дипломатско лудило и конфузија не се оправдува. Ова е предавство на националните интереси.
Вакво предавство ќе паметат многу следни генерации. Нивниот единствен план е да не држат во калта на Балканот за да можат да владеат без правила, без европски судови, без контрола. Кога беше СДСМ на власт, како велеа Мицкоски и ВМРО-ДПМНЕ, се сеќавате?
Сме биле „потчинети на Европа“. Тој ќе ја враќаше гордоста. И што добивме? Добивме влада која е целосно потчинета, уценета и купена со кеш и проекти од Вучиќ и Орбан. Ја сведоа државата на последната дупка на Балканот со премиер кој не смее потпис да стави на ниедна одлука без одобрување од неговите газди.
Па кажете ми, кој вистински нема кичма како што љуби Христијан да каже? Оние кои носеа државнички одлуки за европска Македонија или оние кои станаа подизведувачи на авторитарните влади на Балканот, рече Филипче.
Тој зборуваше дека „прво е откриена оската со Србија и Унгарија“.
Сојузот со Орбан и Вучиќ каде што се застапуваат антиевропски и поддржуваат проруски ставови што не доведоа до тоа да сме до листата на Америка со земји од третиот свет.
Второ, намерно поради внатрешна кампања ги продлабочија врските со десничарските антиевропски лидери и се покренаа спорови со нашите соседи, ризикувајќи ја европската интеграција за домашна моќ и пари.
Трето, таа оска ги штити интересите на Москва, на Балканот со инвестиции што не врзуваат за авторитарните режими. Ова е предавство на националните интереси. Вакво предавство ќе памтат многу следни генерации.“, порача Филипче.
На Конгресот во работниот дел затворен за јавноста усвоен беше извештајот за локалните избори што се одржаа минатата година, а поддршка добија и телата и органите на партијата.
Филипче по завршувањето на Конгресот додаде дека од аспект на дискусија, од аспект на предлози, совети, забелешки, критики, од аспект на пофалби, Конгресот бил многу успешен.
„Имавме одлична дебата, многу дискутанти и секој и сечие мислење беше конструктивно, добронамерно. И критиките и пофалбите“, рече Филипче.