Граѓаните да не наседнуваат на провокациите и да не одговораат на ист начин, со закани, порачуваат аналитичарите искусните политичари, граѓанските организации, по синоќешните протести на активистите на ВМРО ДПМНЕ каде актуелните функционери праќаа закани и повикуваа на говор на омраза, до оние кои наводно сакале да им ја украдат победата.
Повиците„Ќосето е жив“, Клетите шиптари“, пораката од Валентина Божиновска дека ќе се случи „Ноќ на долгите ножеви“, од Амди Бајрам кој рече дека на Зоран Заев “многу бргу ќе му дојде погребот”, ги „запали“ насобраните приврзаници на ВМРО ДПМНЕ кои до раните утрински часови ја отежнуваа работата на ДИК.
Проминетниот академик Абдулменаф Беџети за НОВА ги коментира тензичните протести пред ДИК и повикување на смирување на страстите:
-Мислам дека пост- изборните случувања на подигнати тензии можат да наштетат на фрагментираното општество- не само во рамки на мултиетничност, туку и внатреетнички односи.
Македонија после четврт век после воведувањето на демократијата не може да се врати на нејзините почетоци, бидејќи таа доста напредуваше во европските и евро-атланските интеграции и процеси и патот кон Европа и ова може многу да и наштети.
Сериозните политички субјекти треба да бидат на висина и нивната одговорност е да ги смират страстите, зошто тоа може да доведе до далекусежни последници за општеството во целина.
Според Стојан Андов искусен политичар и поранешен претседател на Собранието на РМ, синоќешните протести пред ДИК се знак колку негативно може да се влијае на целокупната атмосфера кога поединци ги искажуваат своите фрустрации во името на партијата, при што го оневозможуваат законското право на ДИК да одлучуваат по однос на приговорите.
„Тоа е непочитување на Законот и преставува притисок на поединци кои сакаат да покажат дека тие се борат за Македонија. Таков спас на Македонија не и треба. Тие во име на партијата создаваат атмосфера на тензија и повикуваат на насилство. Верувам дека граѓаните ќе се воздржат и нема да наседнат на овие провокации и нема да одговорат на ист начин со закани“, изјави Андов за НОВА.
На социјалните мрежи се повикува на одмазда има отворени закани до активисти на Шарената револуција. Две закани беа упатени до Павле Богоевски пратеник на опозицијата и еден од предводниците на Шарената револуција каде се вели „ тоа што правевте ќе ви прават сега“, „спремен ли си“, „да не ти треба нова фасада“?
Ова не е прв пат активисти да се соочуваат со јавни повици на линч. Истите притисоци можеа да се забележат и за време на Шарената Револуција, но и претходно кога некој активист/ка ќе станеше поголем трн во окото на режимот, вели Богоевски за НОВА.
„Сакам да потсетам дека објавувањето на содржини на интернет со кои се помага, промовира или поттикнува омраза или насилство претставува Ширење на расистички и ксенофобичен материјал по пат на компјутерски систем (чл.394-г КЗ), истото се гони по службена должност и казната е од една до пет години затвор. На изборите, повеќе од 612,000 граѓани гласаа против режимот, против Груевски. Гласаа за промени. Груевски знае дека е поразен, а ние нема да дозволиме да не опседне со неговите повици на одбрана од непостоечки непријател, омраза и насилство. Без разлика на притисоците и заканите, ние ќе продолжиме понатаму. Бидејќи од почеток знаевме дека нема да е лесно и бидејќи вреди да се бориш за Македонија без криминал во власта“, порача Богоевски.
Синоќа за време на протестите на поддржувачите на ВМРО-ДПМНЕ пред ДИК на социјалните мрежи се појавија списоци со имиња и презимиња и со адреси и на другите активисти од „Шарена револуција“ и со повик до приврзаници на ВМРО-ДПМНЕ да „се посетат“ посочените личности.
На „Твитер“ се ширеше список со адресите на кандидатите за пратеници на СДСМ од граѓанскиот сектор, Павле Богоевски и Ивана Туфегџиќ, а на него беше и активистот на „Шарена револуција“ Демијан Хаџи-Ангелковски.
Со реакција се јави Хелсиншкиот комитет за човекови права од каде потенцираат дека Кривичниот законик предвидува казна затвор од 1 до 5 години за оној кој што со присилба, малтретирање, загрозување на сигурноста, излагање на подбив на националните, етничните или верските симболи или на друг начин, ќе предизвика или ќе разгори омраза, раздор или нетрпеливост.
Во истата насока е и списокот кој циркулира на социјалните мрежи во кој се наведени адресите на дел од кандидатите за пратеници и активисти на Шарената револуција, со повик до приврзаниците на ВМРО ДПМНЕ и коалицијата, да “се посетат” овие личности, велат од Хелсиншки.
На синоќешниот протест меѓу присутните неколку стотини граѓани можеа да се забележат директори на училишта, директори на институции, вработени во администрацијата, актери. Со зурли, тапани и ора, со пеење на патриотски песни, се вршеше притисок врз работата на ДИК, а функционери на партијата често повторуваа „Лопови“ и „Нашето трпение истече“.