Посредникот во спорот со Грција, Метју Нимиц по денешната средба со министерот за надворешни работи, Никола Димитров изјави дека засега охрабрувачики е што ова прашање е во фокусот и на двете влади, и на грчката и на македонската.
Како што рече Нимиц тој увидел решителност и подготвеност за ставање крај на овој дводецениски проблем, но дека секоја од страните треба да го земе предвид мислењето на другата страна.
Нимиц информираше дека на средбата со премиерот Заев утрово потоа и со министерот за надворешни работи не се разговарало за конкретни предлози, односно ниту новата Влада ниту тој не ставиле на маса нешто ново, и дека е рано да се зборува за конкретно решение.
„Охрабрен сум што ова прашање кое е важно за регионот, за ОН како и за оваа држава е во фокусот. Охрабрен сум од фактот што има сериозен интерес и волја да се интензивира ова прашање. Разговарам и со Атина, требаше да одам таму но го одложив состанокот. За да се реши овој проблем потребен е генерален прогрес. А тоа значи и двете страни да ги кажат страните и потоа да ја сослушаат другата. Не разговаравме за нови предлози за името ниту, пак, дојдов со конкретен предлог. Разговаравме за самиот процес и за тоа како да се интензивира“, рече меѓу другото Нимиц.
Сепак, како што рече тој, политичка волја постои и од македонска и од грчка страна.