Есма Реџепова-Теодосиевска својата повеќедецениска кариера ја збогати со титулата Национален уметник за 2013 година. Од годинава до крајот на животот таа секој месец ќе добива паричен надомест по 60 илјади денари.
– Есма Реџепова-Теодосиевска во последните децении се етаблираше во сите европски и светски центри и ја промовираше македонската култура во меѓународен контекст. Во текот на своите 55 години активно музицирање, учествувала на врвни музички фестивали и манифестации низ светот, со што даде голем придонес во афирмирањето на македонската култура и традиција надвор од нашата држава, изјави денес министерката за култура Елизабета Канческа Милевска.
Во својата 55-годишна кариера, Есма има остварено повеќе од 12.000 солистички концерти во Република Македонија и надвор од неа. Во нејзината дискографија се наведени 15 албуми за домашни и странски продуцентски куќи, а остварила соработка со еминентни музички светски имиња.
Одлуката Есма да биде добитник на титулата Национален уметник за годинава ја донела Комисијата за утврдување предлог за национален уметник во состав Стојан Стојков – композитор, Данчо Чевревски – професор на Факултетот за драмски уметности, Влатко Стефановски – музичар, академик Луан Старова и академик Васко Ташковски.
Покрај Есма, за оваа титула биле предложени и Борис Трајанов и Рамзи Бела.
Есма Реџепова-Теодосиевска е третата личност која ќе ме да се пофали со ова највисоко признание од областа на културата, по афирмираните уметници Симон Трпчески, кој беше прв добитник и Милчо Манчевски, кој титулата ја доби лани.