„Сите процеси за кои постојат докази продолжуваат од точката во која се застанати во моментов“ рече денеска премиерот Зоран Заев, одговарајќи на новинарско прашање дали со новото законско решение за СЈО всушност го спасува неговиот коалициски партнер, лидерот на ДУИ, Али Ахмети.
„Сите процеси за кои постојат докази продолжуваат, доказите се живи и здрави тие постојат, не може некој да ги уништи, да ги сокрие, соодветно се распределуваат во државното обвинителство, понатаму во новото СЈО за висока корупција, во обвинителството за организиран криминал, во скопското или во некое од внатрешноста. Предметите соодветно се распределуваат затоа што докази постојат“ кажа Заев.
Премиерот наведе дека со новото законско решение во ниту еден момент не се гледала можност некој да се спаси или да се оцрни и изрази верување дека ќе се обезбеди консензус за законското решение за јавното обвинителството, каде е вклучен и статусот на СЈО.
Премиерот повтори дека во новиот закон прислушуваните разговори ќе се користат за случаите до 30 јуни 2017 година, односни за 18-те предмети, кои се поднесени до судовите.
„Законот предвидува дека разговорите по тој датум нема да се користат, ама процесите ќе продолжат. Тоа е дел од договорот од Пржино, тие 18 месеци“ рече Заев.
Предлог-законот засега има подрршка од владејачкото мнозинство, односно од 68 пратеници, се уште го нема потребното двотретинско мнозинство, но тој очекува дека ќе бидат обезбедите 80 пратенички гласови.
На барање на ВМРО ДПМНЕ, најверојатно во недела ќе се одржи лидерската средба меѓу Мицкоски и Заев за новиот Закон за Јавно обвинителство.