Заврши претресот на „Инвока Груп“, фирмата преку која поранешниот генерален секретар на Владата Драги Рашковски го набави софтверот за следење на брзина на возилата вреден 81илјади евра.
Истражителите попладнево си заминаа со две вреќи документи, а според информациите обвинителството дејствува по допрен глас.
Освен од „Инвока“ документи биле земени и од домот на сопственикот на фирмата.
Софтверот е набавен во време кога со државата раководеше техничка влада ормирана да организира и спроведе избори.
Од Министерството за внатрешни работи велат дека немале потреба од ваков софтвер, а за Рашковски велат дека го купил без да се координира со МВР.
Останува отворено и прашањето зошто софтверот е купен без да се тестира бидејќи документите покажуваат дека првото тестирање кое било успешно е направено два месеци по набавката, во септември минатата година.
Рашковски, по одморот во Мексико, повторно е на работа во Кабинетот на премиерот. И покрај претресите и предистрагата за Владата нема ништо спорно и тој не е суспендиран.
Вицепремиерот за борба против корупција, Љупчо Николовски, вели дека барањето за разрешување на Рашковски не е во негова надлежност бидејќи не е опфатен со етичкиот конедс додека премиерот Зоран Заев изјави дека нема конфликт на интереси во случајот.