Христо Петрески добитник на награда за театарска критика

Редакцијата на списанието за уметност „Сум” воведе награда за театарска критика, која за прв пат ќе му биде доделена на Христо Петрески за серијата објавени театарски рецензии во текот на 2012 година
Жири-комисијата во состав: Јордан Плевнеш, Блаже Миневски и Трајче Кацаров едногласно одлучи прв добитник на наградата да биде Христо Петрески.
Името на наградата која во иднина ќе биде традиционална е „Ерго СУМ”, а годинава ќе биде доделена на 27 март – Светскиот ден на театарот. Наградата се состои во уметничка слика, статуетка и плакета.
Наградата му се доделува на добитникот за објавените театарски рецензии за претставите: Хасанагиница, Животот на Молиер, Хенри Шести, Госпоѓица Јулија, Енциклопедија на изгубеното време, Човекот перница, Генетика на кучињата, Декамерон, Јустинијан Први, Домот на Бернарда Алба и други.
Инаку, Петрески е критичар и есеист, писател, издавач и универзитетски професор, тој неодамна ја состави и публикуваше книгата “Македонска театарска критика” во која се застапени вкупно 15 истакнати македонски театарски критичари.