По објавувањето на Унилатералната изјава на Република Северна Македонија приложена кон записникот од првата политичка меѓувладина конференција, во јавноста денес е пуштен таканаречен „Проглас за заштита на македонскиот јазик и книжевност и на македонистиката“.
Како причина за овој потег, како што се наведува, е изоставеноста на значајните научни факти за историјата и континуитетот на македонскиот јазик и книжевност, а едновремено се „изнесуваат научно неточни тврдења за македонскиот јазик“, велат тие.
„Ние, младите македонисти, должни сме да застанеме во одбрана на научната вистина и македонистиката и да не дозволиме да бидеме современици на отпочнување етапа на самонегирачки процес, со политички акт во којшто не се земени предвид научно потврдените сознанија и заклучоци ниту на македонската, ниту на светската филологија“, се вели во дописот.
Потписници се 33 претставници, научни и стручни работници од Институтот за македонски јазик „Крсте Мисирков“, Катедрата за македонска книжевност и култура при Филолошкиот факултет „Блаже Конески“, Истражувачки центар за ареална лингвистика „Божидар Видоески“, МАНУ, Лексикографски центар, МАНУ, Институт за македонска литература, професори по македонски јазик итн.
„Бараме веднаш, без одложување, од страна на Владата, односно МНР, оваа Изјава да биде повлечена во целост, имајќи предвид дека со неа не се почитуваат востановените научни сознанија и утврдени факти за македонскиот јазичен, книжевен и културен идентитет“, се вели во прогласот. (Р.Н.)