Поради недоволно мнозинство на гласови, Уставниот суд не донесе одлука за предметот „работа во недела“ што го иницираше Стопанската комора на Северна Македонија.
Портпаролката Христина Беловска нагласи дека ова е уште еден од 40-те предмети кои не минаа на седница поради тоа што нема доволно мнозинство.
„Рефератот на овој предмет гласеше да не се поведе постапка што значи Законот да остане во правниот поредок, односно недела да остане неработен ден освен за дејностите за кои е исклучок и кои се предвидени токму во овој Закон. Овој предмет не го доби доволното мнозинство, а еден од судиите се изјасни дека нема да го поддржи рефератот“, заклучи Беловска.
За да се донесе одлука на Уставниот суд му се потребни најмалку пет гласа, а во моментот има вкупно претмина судии од кои еден имаше спротивставено мислење, па поради тоа предметот не мина на седницата.
По иницијативата за овој предмет, судиите ќе се навратат кога македонското Собрание ќе го комплетира Уставниот суд со доволен број на судии.
Во иницијативата се наведува дека ден на неделен одмор може да биде кој било друг ден во неделата, дека е утврден и додаток на плата за работа во недела во износ од најмалку 50 проценти за секој час поминат на работа и од тие причини е дозволена нееднаквост на граѓаните пред законите, велат од Уставен суд.
Содржани се и наводи дека со ова законско решение работодавачите од економските дејности на кои им се забранува работа во недела и имаат еднаква правна положба од аспект да ги намируваат данокот и другите јавни давачки кон државата кои се утврдени со закон се ставени во нееднаква правна положба со работодавците од економските дејности на кои им е дозволено да работат во недела, од аспект да остваруваат приходи и добивка.