Преговорите меѓу претседателот на САД, Доналд Трамп, и рускиот претседател, Владимир Путин, можат да бидат значајни за билатералните односи меѓу двете земји, но одлуки за Украина не можат да се донесат без нејзино учество, изјави украинскиот претседател Володимир Зеленски.
Да се зборува за Украина без Украина не е возможно и никој нема да го прифати тоа. Разговорот меѓу американскиот претседател и Путин може да биде важен за нивниот билатерален курс, но не можам да прифатам ништо за Украина без нас, истакна Зеленски на украинскиот младински форум „Младоста е тука“, пренесе „Укринформ“.
Тој најави дека ќе се одржи трилатерален состанок на лидерско ниво, но датумот сè уште не е познат. „Застанете за вистината, направете сè за да ја завршите војната“, порача украинскиот лидер.