Даниел Андре Танде, по Гармиш, победи и во Инсбрук во третиот натпревар од традиционалните „Четири скокалници“ и го презеде водството во генералниот пласман на новогодишната турнеја пред финалето во Бишофсхофен, но и во Светскиот куп во скијачки скокови.
Лошите временски услови и силниот ветар од променлив правец не дозволија две серии во Инсбрук. И единствената, поради честите прекини, траеше околу час и 35 минути. Норвежанецот притоа се снајде најдобро во тешките услови во австрискиот центар и со скок од 128,5 метри што му донесе 125,7 бода го освои првото место.
Второто место му припадна на неговиот сонародник Роберт Јохансон со скок од 133 метри (123,1 бода) кој за првпат заврши меѓу најдобрите десет. Изненадувачки трет беше Русинот Евгениј Климов со скок од 127 метри (119,1 бода) за прв подиум во кариерата.
По три натпревари на новогодишната турнеја, Танде води со 710,3 бода пред Полјакот Штох со 708,6 и Австриецот Штефан Крафт со 693,7 бода.
Танде, пак, води во Светскиот куп со 632 бода, втор е Домен Превц со 596, а трет Штох со 533.