Законот ги опфаќа и починатите лицa, лустрирани беа и други но само случајот со Славко Јаневски крена прашина, објаснува во интервјуто за Радио Слободна Европа, претседателот на Лустрациска, Томе Аџиев.
Според Аџиев симптоматично е тоа што лицата кои подоцна беа лустрирани, се тие кои го откриле името на Славко Јаневски, и наведува дека можеби затоа што знаеле дека ќе се појават како соработници, го обелодениле името.
Знаевме дека ова е болен процес, дека штом почне да се отвора процесот ќе се јават реакции. Ќе се искористи секоја можност да се нападне Комисијата за да се деградира овој процес за да може евентуално да се спасат од лустрација, надополнува Аџиев.
>> Јанкуловска: Лустрацијата мора да биде спроведена
Осврнувајќи се на критиките кои беа упатени кон работата на Комисијата за верификација на фактите, Аџиев вели не е направен удар врз идентитетот на државата, бидејќи во процесот на лустрација потпаѓа и Претседателот на државата и Претседателот на Парламентот.
„Како е направен тој удар, јас не можам да сфатам? Дека се објавени дваесетина или триесет документи каде што недвосмислено се утврдува дека две лица или три лица соработувале со тајните служби иако во моментот две се на високи позиции во државата и дека ако се откријат тие документи се руши историјата и идентитетот. Не знам јас како тие тоа го сметаат, кога во процесот на лустрација потпаѓа и претседателот на државата, претседателот на Парламентот, претседателот на Владата, министри, пратеници, еден ред на носители на јавни функции и овластувања. Потенцијално сите можеа да бидат соработници, па што ќе ја рушевме државата?“, вели Аџиев.
Како член на Комисијата, претседателот Аџиев, изразува надеж дека сите членови на Комисијата сакаат да го спроведат овој закон, а го спроведуваат, вели, „со цел да и се помогне на државата да излезе прочистена од минатото“.