Претседателот на Лустрациската комисија Томе Аџиев отфрла дека се продолжена рака на власта, ниту пак, како што вели, гледаат кое лице е на власт или во опозиција, во интервју за БИРН.
Аџиев за неговите критики за реакциите на МАНУ, ДПМ, ПЕН дадени во претходно интервју вели:
-Токму тие кои ја критикуваат лустрацијата веројатно се плашат да не бидат и самите лустрирани. Јас не реков дека се кодоши туку прашав да не се уплашил некој. Мене ми беше многу симптоматично што името на Славко Јаневски излезе токму од кај нив.
Согласно законот, доколку комисијата прогласи за соработник лице кое е починато, таа не го објавува ниту неговото име, ниту решението, ниту документите. Тоа останува само во архивата на комисијата, се евидентира и завршува предметот.
Седницата на комисијата уште не беше завршена, а некои новинари, МАНУ и ДПМ веќе излегоа со иницијалите С.Ј. и почнаа да го бранат Славко Јаневски без да имаат сознание дали е тој.
Јас им реков, престанете да го штитите делото на Славко Јаневски бидејќи ние не го цениме неговото дело. Ние не го цениме книжевното дело на Јаневски или на кој било друг. Ние велиме дека имаме документи дека одредено лице било соработник.
Сепак, Аџиев не отфрла можност дека се можни грешки при лустрирањето, но тој не се плаши кога станува збор за мирно спиење:
-Немам никаков страв. Полициско досие имам првпат допрено пред пет години кога дојдов во комисијата. Нити знам што е тоа, ниту ме интересира. Отсекогаш сум бил алергичен на тие служби. Јас работам по закон. Доколку ние не го спроведуваме законот, доколку сме нашле дека некое лице е соработник, а не сме го прогласиле, тогаш нормално дека ни следи конфликт со тој закон.
Јас колку можам се трудам да не згрешиме. Сепак грешки се можни, но ви гарантирам дека тоа нема да бидат намерни грешки.
Аџиев во интервјуто го критикува единствениот опозициски глас во Комисијата:
-Одлуките се донесени во најголем број, едногласно, со исклучок на едно лице кое упорсите одлуки на комисијата ги негира, ги бојкотира. Ниту еден извештај нема сработено, ниту една одлука нема гласано, ниту за една одлука нема кажано позитивен збор за комисијата. Тоа е многу симптоматично и јас не знам што бара тоа лице во оваа комисија, вели Аџиев во интервју за БИРН.