Дезинформирањето на јавноста со свесна намера да се наруши угледот на господинот Седат Пекер. Ова е коментарот на адвокатите на турскиот државјанин Дублин Караџа и Јасмин Калач кои преку соопштение тврдат дека нивниот клиент не поседувал фалсификуван македонски пасош.
„Реис Седат Пекер категорично и целосно ги отфрла содржината на насловите и прилозите емитувани на порталите и медиумите како невистинити и тенденциозни. Дезинформирањето на јавноста со свесна намера да се наруши угледот на Пекер се гледа од тоа што прилозите се подготвени надвор од професионалните новинарски стандарди, а пренесените вести се во целост лажни“, се вели во објавеното соопштението во кое меѓудругото се бара и јавно извинување од медиумите кои објавиле таква информација.
За поседувањето македонски пасош на Седат Пекер на прес-конференција во вторникот зборуваше и лидерот на ВМРО-ДПМНЕ, Христијан Мицкоски. Повикувајќи се на документи што ги поседува, Мицкоски рече дека Седат Пекер од Турција, кој бил протеран од Македонија, се појавил во полициската станица во Драчево и се сликал за личен документ под името Џадин Адемовски, како бизнисмен.
Премиерот Зоран Заев, пак, денеска на новинарско прашање за тоа дали Пекер се среќавал со негови коалициски партнери не негираше дека Пекер е еден од оние што добиле фалсификуван пасош и притоа нагласи дека тој што работел на нелегалното издавање пасош е дел од самата постапка која е процесирана пред правосудните органи.
„Господинот што го спомнавте е еден од тие што добиле фалсификуван пасош, истовремено е осомничен за одредени дела во Турција. МВР го избрка како персона нон грата од државата по други видови постапки. Секако тој што работел на нелегалното издавање пасош е дел од самата постапка која е процесуирана пред правосудните органи, вели македонскиот премиер.