Едвард Сноуден не беше платен за откривање на тајните информации, сето тоа го правеше поради алтруизам, без финансиска корист, изјави адвокатот на поранешниот соработник на НСА. „Убеден сум во тоа на основа на неговата сегашна финансиска ситуација“, истакна Анатолиј Кучерна.
-Тој никогаш не тргуваше со тајните информации и не доби никакви средства, уште кога беше во Хонгконг. Убеден сум во тоа на основа на неговата сегашна финансиска ситуација, потенцира Кучерна.
Според адвокатот на Американецот, Сноуден веќе ги потрошил своите заштеди и сега живее од донации од добротворни организации, како и од приватни спонзори. Тој вели, мора да му помага на Сноуден не само за правните прашања туку и секојдневниот живот.
Сноуден има високо професионално знаење во IT индустријата, и „има светла иднина во било која земја“. Тој веќе пронајдил работа во Русија, тврди Кучерна.
Поранешниот вработен во Националната агенција за безбедност на САД, Едвард Сноуден, во август доби едногодишен азил во Русија, по објавувањето на документите кои покажуваат масовно шпионирање од страна на Агенцијата. Доколку ја напушти Русија, таквиот статус ќе го изгуби.
Во САД е баран под обвинение за шпионажа и за откривање класифицирани документи.