Рочиштата за двата предмети во кои како тужители се јавуваат лидерот на ДУИ, Али Ахмети и Муса Џафери против поранешниот разузнавач Слободан Богоески за клевета за неговото сведочење пред американските судови, се презакажани за 27 јануари следната година, бидејќи Богоески не ги добил тужбите навреме и не доставил одговор на тужба за што има уште рок.
Ахмети и Џафери, кои денеска не се појавија во судницата, го тужат Богоески за клевета за неговото сведоштво во судот во Њујорк за случајот „Маѓар телеком“, а како отштета лидерот на ДУИ бара 3 милиони денари додека Џафери 2.5 милиони.
Изјавата што ја даде Богоески пред американската Комисија за хартии од вредност, како и пред окружниот суд во Њујорк во Македонија предизвика реакции во јавноста откако американскиот суд ја објави, а македонските медиуми ја пренесоа.
– Целта е јасна. Тие сакаат во ненадлежен суд да издејствуваат некаква одлука која би ја користеле во кривичната постапка која се води во Јавното обвинителство за организиран криминал против овие нив и да се амортизира мојата изјава и постапката пред њујоршкиот окружен суд, сметајќи дека ова е најлесен начин кој ќе им помогне во таа постапка, изјави Богоески по излегувањето од судницата.
Самата тужба за клевета, вели тој, не е дозволена а тоа тужителите во случајот го знаеле.
Богоески најави дека ќе покрене кривична постапка против Ахмети и Џафери, бидејќи како што вели тој, согласно американското и македонското законодавство самата тужба за клевета за исказ даден во судска постапка не е дозволена и се смета за влијание врз сведоци.
Адвокатот од одбраната, Валентин Зафиров посочи дека денешното подготвително рочиште било закажно поради актуелната политичка ситуација, односно дека тужбата била поднесена уште минатата година, кога Богоески бил во затвор, а била доставена дури сега.