Агенцијата за храна и ветеринарство утре ќе ги објави официјалните резултати од сите анализи за бактеријата листерија кои се направени во лабораториите на Факултетот за ветеринарна медицина и од Институтот за јавно здравје, откако ќе бидат комплетирани испитувањата од Институтот.
Од Агенцијата потврдуваат дека досега се пристигнати комплетните резултати од извршените испитувања на мострите во лабораториите на Факултетот за ветеринарна медицина и дел од резултатите од анализираните мостри во Институтот за јавно здравје.
-Во врска со минатонеделните активности поврзани со контролите во месната индустрија „Екстра меин“ од Куманово, како резултат на известувањето од Министерството за здравство за детектирано присуство на листерија (Listeria monocytogenes) во производ сечкан свински врат земено од малопродажен објект во Гевгелија, инспекциските служби на Агенцијата за храна и ветеринарство врз основа на законските надлежности зедоа мостри за лабораториско испитување од спорните лотови од производот сечкан свински врат, од работните површини, машините и од сите други места во погонот на оваа компанија, за утврдување на евентуално присуство на листерија, соопштуваат во Агенцијата за храна и ветеринарство.
По комплетирање на резултатите од лабораториските испитувања кое е најавено за утре, среда, Агенцијата за храна и ветеринарство ќе ги објави финалните резултати.