Масовен јавен протест или генерален штрајк на вработените во образованието, најавија од СОНК доколку не се постигне договор со Владата за усогласување на платите на просветните работници.
Советот на СОНК ќе заседава во сабота, а на седницата ќе треба да се донесат одредени заклучоци за кои Синдикатот одобрение и поддршка ќе бара и од членството. Не ја исклучуваат можноста одлуката на Советот да биде протест или штрајк. Ќе се активира доколку не се најде заедничко решение со Владата за усогласување на платите во образовната дејност на национално ниво согласно Колективните договори.
Според СОНК усогласувањето треба да важи за вработените во основното, средното и високото образование, како и за оние во ученичките и студентските домови.
„Револтот од членството е огромно, членството очекува од нас енергична синдикална акција. Се додека не се исцрпат сите синдикални средства ќе се обидеме да најдеме заеднички јазик со надлежните“, рече на денешната прес конференција претседателот на СОНК, Јаким Неделков.
Неделков алармира дека со покачувањето на минималната плата 10 различни работни позиции во градинките ќе земаат иста плата и покрај тоа што имаат различен степен на сложеност на работата.
“Во основното образование 5 работни позиции, а во средното образование 4 работни позиции со различни коефициенти и различна сложеност на работа од 1 април ќе земаат минимална плата. Непринципиелно е да не се почитуваат колективните договори кои што имаат сила на Закон”, додава тој.
Според информациите на СОНК, од понеделник до среда во Владата ќе заседава Економско-социјалниот совет, каде ќе се разговара и за усогласување на платите на вработените во јавниот сектор, пред се во образованието.
Ако преговорите не бидат успешни, голема е веројатноста дека просветните работници масовно ќе излезат на улица, додаваат од СОНК.
(Б.Божиновска)