Претседател на синдикатот на Драмскиот театар ќе биде режисерот Сашо Миленковски, откако актерката Ирена Ристиќ била прогласена за „неподобна“ од страна на СОНК.
Ристиќ беше избрана за синдикален претставник на состанок на кој беше предложена од шестмина вработени, а на кој ја изгласаа вкупно 27. Овој пат на состанокот присуствувале 32-ца вработени.
Таа на својот Фејсбук профил, објави дека до неа стигнало писмо од СОНК каде и било речено дека е неподобна за да го претставува синдикатот.
Освен писмото, против неа до СОНК биле поднесени неколку приговори, а за еден од нив актерката вели дека е од новоизбраниот претседател Миленковски.
-Од СОНК добив писмо каде ми велат дека грубо сум го нарушила угледот на Синдикатот со моите активности. Ова е уште еден доказ како функционираат работите. Јас го напуштив состанокот откако не ми беше одговорено на ниту едно прашање, како на пример што е „неподобно“ и како тоа го констатирале, вели Ристиќ.
За време на денешниот состанок вработените реагирале на ваквите дискфалификации од СОНК и за време на состанокот им порачале на претставниците дека не може СОНК да го бира нивниот претставник.
Миленковски пак бил избран од мнозинството присутни членови.
Ирена Ристиќ изминативе месеци отворено е критичарка на актелната влада и се појавува често на антивладините протести поради што се сомнева дека квалификацијата „неподобна“ и се става во политичка конотација како неистомисленик на власта.