Над 10 килограми нежигосани предмети (злато и златен накит) се одземени во контроли што биле извршени вчера кај повеќе правни лица кои се занимаваат со откуп, изработка и продажба на златен накит на подрачјето на Скопје, на Тетово, на Гостивар и на Кичево.
Полициски службеници од Одделот за криминалистичка полиција при МВР – Сектор за економски криминал и корупција, во координација со Државниот пазарен инспекторат и Управата за јавни приходи, констатирале и непочитување на обврските кои произлегуваат од Законот за регистрирање на готовински плаќања, како и кривични дела определени во Кривичниот законик.
„При контрола на осум златарници во Скопје беа пронајдени и одземени околу 661 грам нежигосано злато, во Тетово при контрола на 11 златарници беа пронајдени и одземени 7.399 грама нежигосано злато, во Гостивар при контрола на седум златарници беа пронајдени и одземени 1.690 грама, а во Кичево при контрола на три златарници беа пронајдени и одземени 269 грама нежигосано злато“, соопштија денеска од МВР.
Државниот пазарен инспекторат и Управата за јавни приходи констатирале и други неправилности кои се соодветно санкционирани. По целосно документирање на случаите против сопствениците и правните лица ќе бидат поднесени соодветни пријави.