Албанска партија упати закана до Македонците од Мала Преспа дека штом дојдат на власт ќе ги вратат албанските имиња во Мала Преспа. Лидерот на Алијансата на Црвено црни, Крешник Спахиу заканите ги упатил од партискиот собир во Поградец и порачал дека не ги сака гласовите на Македонците на престојните избори во јуни.
– Пред околу една година предложивме идеја за предлог-закон за албанските и странските топоними. Тогаш ги прашавме граѓаните во Поградец, што значање има името Поградец и ниту еден од нив не го знаеше одговорот. Тој ден дојдовме со ветување дека ќе ги албанизираме имињата на нашите села и градови и тоа ќе го направиме без компромис, не копирајќи никој и без политички пазар. Но за жал, денеска во пресрет на парламентарните избори на 23 јуни, наместо албанизирање се случува спротивното, албанските имиња се словенизираат изјавил Спахиу.
Тој додал дека ќе ги врати „албанските имиња на сите населени места, зашто тоа биле етнички албански територии“.
Комесарот за заштита од дискриминација во Албанија, Ирма Бараку, решавајќи по жалбата на градоначалникот на Пустец, Едмонд Темелко во врска со сериозните инциденти предизвикани од членови на Алијасата Црвено црни, на 16 декември минатата година, донесе решение со кое Алијансата во рок од 30 дена треба јавно да им се извини на Македонците од Пустец, во спротивно ќе добие парична казна.