Точно за една недела во продажба ќе се најде најновиот, 36-ти по ред, албум на американскиот кантавтор Роберт Цимерман, многу попознат како Боб Дилан. Иконата на фолк-рок сцената од САД последниот албум Tempest го издаде во 2012 година, меѓутоа новата плоча ќе се разликува од претходните бидејќи на неа Дилан всушност ќе преработи десет песни на можеби уште попопуларниот пејач и актер од минатиот век, Френк Синатра.
Албумот ќе го носи насловот Shadows In The Night.
Во мај минатата година Дилан пушти на интернет една од десетте преработки, Full Moon and Empty Arms, додека уште еден сингл од најновиот материјал, Stay With Me, се најде на списокот на песни со коишто Дилан лани настапуваше на концертите.
Остатокот од песните досега не се слушнати.
Боб Дилан во неколку наврати потенцираше дека не станува збор за албум со класични преработки, туку, како што рече, на сите 10 песни им вдахнал нов дух и ги оживеал со помош на својот бенд.
Издавачката куќа „Колумбија рекордс“ уште од сега највува дека Shadows In The Night е брилијантно остварување и покрај тоа што Дилан го преработува Синатра без гудачки инструменти, труби и без пратечки вокали кои беа карактерисични за опусот на починатата музичка легенда.
Дилан, кој годинава ќе полни 73 година, повеќе од половина век снима плочи, а дел од неговите најдобри остварувања како The Freewheelin’ Bob Dylan (1963), Bringing It All Back Home (1965), Highway 61 Revisited и (1965) Blonde on Blonde често се во изборот на најдобри албуми на минатиот век.
Песната Full Moon And Empty Arms е напишана во 1945 година и досега доживеала неколку интерпретации меѓутоа онаа на Синатра е најпозната, а интересно е дека нејзиниот автор Буди Кеј ја напишал врз основа на Концертот за пијано број 2. на Русинот Сергеј Рахмањниов.