Амбасадорите на САД и на земјите членки на Европската Унија во недела ќе ги набљудуваат избирачките места на кои ќе се гласа во општина Центар.
Со оглед на фактот што ОБСЕ и ОДИХР ја завршија својата мисија, странските амбасадори во Скопје одлучиле лично да го следат гласањето во Центар.
Од невладината „Цивил“ ги повикуваа сите учесници во изборната трка да го почитуваат изборниот молк, а на денот на прегласувањето да бидат фер и да се придржуваат кон законите и принципите на демократијата.
Хелсиншкиот комитет за човекови права отвори канцеларија, каде што граѓаните ќе можат да пријават повреда на избирачкото право за време на прегласувањето во недела.
Пред утрешното прегласување на вториот круг од локалните избори во дел од изборните места во Центар и Струга и едно во Ѓорче Петров, и втор круг во Долнени, денеска гласаат изнемоштени и болни лица.
Во трите општини каде што се прегласува вториот круг шеесет болни и изнемоштени ќе го искористат своето право на глас.
Во скопската општина Центар ќе гласаат 31 изнемоштено и болно лице, Ѓорче Петров три,
а во Струга 26.
Во Долнени, каде се оди на втор круг од локалните избори, пријавени за гласање се 216 изнемоштени и болни лица.