Амбасадорот на земјава во Кралството Велика Британија ја повикува тамошната дијаспора да се зачлени во црковниот одбор на Македонската Православна Црква – Охридска архиепископија, “Св. Архангел Михаил и сите Свети Ангели – Лондон” кој од неодамна е формално регистриран. Македонци кои живеат во Британија ни пишаа дека од денеска амбасадата почнала да дистрибуира електронска пошта преку која лично амбасадорот Донев ги повикува и моли да станат членови на одборот.
-Амбасадорот Донев лично ве повикува и замолува согласно своите желби и можностите да станете член на ова здружение. Здружувањето и самоорганизирањето на македонската дијаспора во Обединетото кралство, е потреба, не само на самата дијаспора, туку и на Република Македонија.
Донев во емаилот до дијаспората ја објаснува и потребата од членство во црковниот одбор велејќи дека „видот и обемот на активностите би се подобрил и зголемил, но би се отворила и можност за евентуално аплицирање пред Советот на Вестминстер за добивање на посебен простор“, а на крајот од писмото помалку филозофски го надопололнува објаснувањето.
-Стара вистина е дека секоја нација, а во тие услови и секоја дијаспора, во услови на глобален натпревар најдобри резултати постигнува кога зборува во еден глас. Во овој момент не постои никаква објективна причина зошто по примерите на нашите дијаспори во останатите европски и вон-европски држави и дијаспората во Обединетото Кралство да не го направи тоа, пишува амбасадорот Донев.
Отец Пимен од Европската епархија надлежна за ограноците во европската дијаспора за НОВА вели дека тој не го контактирал лично амбасадорот, но тамошниот Отец Виктор кој служи во Лондон го договорил овој потег. Вели, го замолиле Донев најчовечки да помогне.
„Ние не го ставаме Донев во функција на црквата, но тој со својот авторитет може да ни помогне во членство и донации сите граѓани и верници“, вели Отец Пимен.
На прашањето на НОВА дали амбасадорот ги претставува само православните верници или сите граѓани на Македонија, Отец Пимен вели „ние не го ставаме Донев во функција на црквата, но тој со својот авторитет може да ни помогне во членство и донации“.