Здравствените домови во државата не набавуваат ампули Налоксон, кои спасуваат живот при предозирање на зависниците, или пак набавките ги прават кампањски тврдат во невладината организација ХОБС.
Лекот Налоксон спасува човечки живот кај предозирања со хероин и метадон доколку се даде веднаш, но многу Здравствени домови и Служби за итна медицинска помош во државата не го предвидуваат во своите месечни и годишни набавки, со исклучок на две- три здравствени установи. Ова значи дека повеќето градови го немаат овој лек кој спасува живот кога некој млад човек ќе побара помош при предозирање.
-Апелирам до Здравствените домови во своите набавки за 2014 година да го планираат Налоксонот бидејќи не можеме да знаеме колку предозирања може да има, а лекот е ефтин, чини само 100 денари ампула. Секоја здравствена установа треба да го има овој лек, а доколку не се употреби подобро е да се фрли отколку да се изгуби млад живот, изјави за НОВА Христијан Јанкуловски извршен директор на ХОБС.
Според истражувањето кое го направиле во оваа невладина организација само во последните три години имало 865 интервенции поврзани со дрогата од страна на Итната медицинска помош и Клиниката за токсикологија. Не е голем трошок доколку се набават околу 1000 ампули годишно, ако се знае дека некому може да спасат живот потенцира Јанкуловски.
Во мај годинава една скопска веледрогерија донирала поголема количина на Налоксон со рок на траење до октомври. На последниот семинар на ХОБС медицински лица од скопската Служба за итна медицинска помош се пожалиле дека ќе останат без неопходниот лек бидејќи рокот на траење од донираните ампули истекол и треба да се фрлат, а нивното уништување во Дрисла дополнително треба да се плати.
-Има случаи кога луѓе умирале на улица во некои градови, бидејќи медицинската екипа немала Налоксон. И доколку во извештајот лекарот напише дека не го дал лекот бидејќи го немале, се амнестира од одговорност вели Јанкуловски.
На Клиниката за токсикологија каде се препраќаат овие пациенти и тие секогаш мора да го имаат лекот, велат дека се случувало од итната медицинска помош да им донесат пациент на кој не му дале Налоксон.
-Обично образложението беше дека брзале па затоа не дале анти-дот терапија или пак се правдаа дека не можат да му најдат вена за да го боцнат иако се дава и мускулно, изјави за НОВА, Андон Чибишев директор на Клиниката за токсикологија.
Од друга страна, во Службата за итна медицинска помош при Здравствениот дом во Скопје велат дека имаат доволно од лекот, а донацијата воопшто не земале.
-Ние правиме требување секој месец и имаме Налоксон со добар рок на траење, не сме земале од ампулите кои биле донација, изјави Маја Поповска раководител на Службата за итна медицинска помош.
Пред неколку месеци пропаднал и тендерот за овој лек кој го распиша Министерството за здравство бидејќи се јавила само една веледрогерија која немала дозвола за негова дистрибуција. Извори за НОВА од оваа институција велат дека сега се прават анализи како да се набави лекот за наредната година.