Вчер е уапсен мажот осомничен за напад на конгресменка во лифтот на нејзината станбена зграда во Вашингтон, соопшти полицијата. Енџи Крег, демократка од Минесота, возврати со фрлање топло кафе кон напаѓачот, се вели во полицискиот извештај.
Кендрик Хамлин е обвинет дека ја удрил и ја фатил за врат.
Според истрагата, случајот не е политички мотивиран.
Избрана во Конгресот во 2018 година, Крег (50) е мајка на четири деца и служи како копретседател на Конгресната група за еднаквост.
Таа била нападната вчера околу 07:10 часот по локално време, соопшти полицијата. Нејзиниот шеф на кабинет Ник Коу во изјавата рече дека таа „се одбранила од напаѓачот и се здобила со модринки, но инаку е физички во ред“.
Таа повикала брза помош 911 и „напаѓачот побегнал од местото на настанот“.
Крег се заблагодарила на полицискиот оддел за Метрополитен ДЦ „за нивниот брз одговор и бара приватност во овој момент“.
Според извештајот на полицискиот оддел Метрополитен, Крег им кажала на инспекторите дека кога се качила на лифтот, лицето ја следело внатре и „одеднаш почнало да ја турка“ откако таа му рекла ‘добро утро“. Притоа човекот ја удрил конгресменката Крег по брадата и ја фатил за вратот.
Таа се бранела фрлајќи врело кафе кон напаѓачот.
Полицијата претходно објави фотографија од осомничениот и побара од јавноста помош за негово идентификување.
Водачот на Демократската партија на Претставничкиот дом, Хаким Џефрис, рече дека пратеничката група е „ужасната“ од нападот.
Минатата година Конгресот одобри финансирање за зајакнување на безбедноста на пратениците, кои добиваат илјадници закани секоја година.