Концертот на Македонската филхармонија, насловен „Магичната Ана Дурловски“, на кој како солистка ќе настапи нашата сопранистка и добитничка на оперската награда во Германија „Фауст“, ќе се одржи вечерва во 20 часот, во Домот на АРМ
Под диригентско водство на Емил Табаков од Бугарија, Дурловски ќе го отпее „Концертот за колоратурен сопран и оркестар“ од Рајнхолд Глиер, единствен од ваков вид во светската музичка литература. Покрај тоа, на репертоарот се и балетската музика „Валпургиска ноќ“ од Шарл Гуно, увертирата од операта „Набуко“ на Џузепе Верди, како и симфониската поема „Вретеното на Омфал“ од Камиј Сен-Санс, која ќе ја има својата премиерна изведба.
Идната година Ана Дурловски ќе дебитира во престижната оперска куќа „Метрополитен“ во Њујорк како прва македонска уметница на оваа сцена.