Канцеларката Ангела Меркел в сабота ќе оствари посета на Скопје, соопшти пред малку нејзиниот портпарол Штефен Зајберт, објави грчката новинска агенција АНА –МПА.
Како што јави дописничката на МИА од Атина, во кусиот текст, АНА-МПА пренесува изјава на портпаролот на канцеларката, кој вели дека Меркел сака на самото место да формира впечаток во пресрет на референдумот.
– Уште се работи на програмата, но можам да ви кажам дека канцеларката ќе се сретне со премиерот на ПЈРМ, Зоран Заев, изјави Зајберт и додаде дека во фокусот на средбата ќе бидат „регионалните случувања, билатерални теми“, додека пак госпоѓата Меркел „секако сака самата на лице место да формира впечаток во пресрет на референдумот за прашањето за името на земјата, кој што ќе се одржи на крајот од месецот“, пренесува грчката новинска агенција.
Во февруари годинава, Меркел го прими во официјална посета Заев и тогаш искажа поддршка за реформскиот курс на владата и за решавање на спорот за името. Кон крајот на мај, непосредно пред Заев и Ципрас да го постигнат конечниот договор за решавање на долгогодишниот спор, Меркел и телефонски разговараше со двајцата премиери, а претходно на Самитот ЕУ-Западен Балкан во Софија изјави дека се радува на напредокот кој го постигнуваат Атина и Скопје.
Пред две недели премиерот Зоран Заев и канцеларката Ангела Меркел остварија телефонски разговор, во кој таа го поздравила постигнувањето на Договорот со Грција и дала поддршка за напорите на Владата за зајакнување на европските и атланските перспективи на државата.