За жал, ние на чело на Министерството имаме некомпетентни луѓе кои не се разбираат во земјоделството. И највисоко поставените советници исто така не се агрономи. Мислам дека тука има сериозни грешки кои мора да се исправат, вели професор Борис Анакиев, во интервју за Радио Слободна Европа .
Проф. Анакиев вели дека Македонија воопшто и не е земјоделска земја:
-Пред се не знам зошто ја прогласија за земјоделска земја. Земјоделска земја не може да биде со учество во бруто домашниот производ со 8 до 10 отсто или со земјоделско население според пописите 11,9 отсто.
Тоа не е земјоделска земја, ние сме нормална земја во развој. Беше Македонија земјоделска земја во шеесетите години на минатиот век, кога БДП се формираше од 60 отсто земјоделски приход, денеска ние не сме земјоделска земја, тоа е погрешно.
Земјоделството е важно за Македонија, но земјоделството во неразвиени земји ништо не може да направи ако не се развиваат другите дејности…
Ние имаме вишок на градинарски производи, вишок на овошје, на зеленчук, на грозје, на тутун и на јагнешки производи. Тоа се производи кои мораме да ги направиме конкурентни и да ги извезуваме. Од друга страна треба да направите конкурентни производи за супституција на увозот на жито и на место, на зејтин и на шеќер, тука ни се слабостите. Не можеме да произведеме конкурентно производство и мораме да се согласиме дека треба да го подржуваме земјоделското производство соодветно на тоа каде кои можности можеме да ги оствариме.
Но, за финансиската поддршка за земјоделството, тн, директна финансиска поддршка на земјоделството, проф. Анакиев вели:
-Многумина ја мешаат со зборот субвенции, тоа не е субвенции. Субвенции дава Македонија на семенски материјал, на осигурувањето, тоа се субвенции, генерално нашата влада го поддржува финансиски земјоделството, тоа е модел на ЕУ.
Сепак, и покрај овие слаби перформанси, експертите никој не ги консултира, ниту пак користи, вели проф. Анакиев:
-Никој не ве ферма, како реагираат. Нашиве научни институти имаат директори кои не можат да се побунат, кои се, како што знаете, партиски функционери и тоа така си тече, но тие не се виновни. Не се виновни што генерално нема идеи, ни Министерството за земјоделство нема идеи зошто ни се случуваат вакви работи, зошто ние не можеме да го покренеме приносот на пченица од 3 тона по хектар, три тона по хектар не е исплатливо.
До кога мислиме дека на овој начин ќе го штитиме домашното производство? До кога? Тоа не можеме постојано да го правиме, еве сега Србија најавува дека ќе не блокира итн., ние лошо име стекнуваме на светскиот пазар со тоа што реметиме или со административни мерки спречуваме увозот, вели проф. Анакиев.