Иако првично требаше да дојде на прославата на хрватското пристапување кон ЕУ, која ќе се одржи на 30-ти јуни во Загреб, германската канцеларка Ангела Меркел во последен момент ја откажа посетата. Причината треба да ја објасни утре премиер Зоран Милановиќ, со кого ќе се сретнат во Брисел, јавува Порталот Индекс.
Имало шпекулации дека Меркел заради случајот Перковиќ ја откажа посетата на Загреб, но таквите информации не се потврдени. Германската федерална канцеларија за борба против криминалот повторно денес објави налог за апсење на поранешниот висок функционер на југословенската тајна служба Перковиќ, за вмешаност во убиството на хрватскиот емигрант Стивен Ѓурековиќ во 1983 година.
Во Загреб наместо Меркел ќе пристигне државниот министер во Министерството за надворешни работи Михаел Линк. Во официјалното соопштение, портпаролот на германската влада вели дека Меркел во Загреб нема да дојде, бидејќи има “проблеми со терминот”односно дека има “преполн распоред.”