Изборниот процес засега се одвива мирно е првичната оцена на Министерството за внатрешни работи. Според портпаролот на МВР, Тони Ангеловски регистрирани се три помали настани, кои полицијата веднаш ги расчистила и веќе за три лица има поднесено кривични пријави.
-Во 09.15 часот во СВР Тетово, заменик претседателка на гласачко место бр.1972 во основно училиште „Братство Миѓени“ во Тетово пријавила дека С.Д. сакала да го оствари своето право на глас без приложување на соодветен документ за идентификација, односно се обидела да гласа прикажувајќи фотографија од нејзината патна исправа на мобилниот телефон, а откако и било кажано дека тоа е противзаконски започнала агресивно да се однесува кон неа. Се работи на расчистување на случајот – изјави Тони Ангеловски, портпарол на МВР.
Кривични пријави заработија и уште две лица едниот бидејќи искинал гласачко ливче, а другиот за фотографирање на ливчето. Ангеловски посочи дека регистрирани се и пријави за агитација во Кочани и Кратово, но за сега овие пријави не се докажани.
МВР апелира до граѓаните и до учесниците во изборите и во останатиот дел од гласањето да се воздржат од инциденти, а доколку има било какво нарушување на изборниот процес граѓаните веднаш да ја известат полицијата или на бројот 192 или да пријават во најблиската полициска станица.