Анима Мунди, здружението за заштита на животни, е “огорчена и лута” поради “случаите на суровост кон животните, настани кои покажуваат каква девијантност, социопатологија и насилство се толерира во Република Македонија”, вели здружението.
И раскажува неколку последни случаи кои се вознемирувачки кога станува збор за грижата за животните во нашето општетство:
“Во Велес младо и немоќно куче, мирно и преплашено, е врзано за екстремитетите и живо фрлено да умре во Вардар. Видете ги неговите фотографии. Некој психопат го врзал за нозете, фрлил и оставил полека да умре и да се мачи. Среќа, не му бил денот, го спасиле храбри и хумани луѓе Бијлана и Робертино од здружението за заштита на животни „Обезбеди Живот“ од Велес, кои го згрижија и му бараат дом.
Минатата седмица во Велес слаб изнемоштен, претоварен коњ испушти душа на велешкиот асвалт– последно нешто што почувствува беа тупаници да стане и продолжи. Не издржа, умре така, а неговото тело го фрлија во река, да скапува.
Вчера пеколна беше улицата за кутар коњ од Битола, кој падна, се бореше за воздух, на кој пена од устата му излегуваше од немоќта и болката, но мораше да стане.
Викендов ни пристигна и оваа монструозна фотографија, на живо теле ставено во гепек на возило со тетовска регистрација, врзано имобилизирано на начин да не може да се помрдне, избезумено од страв и болка. Регистрацијата на возилото е видлива и институциите може да постапат.”
Анима Мунди го повикува општеството на притисок врз институциите за да може да престане ваквиот однос кон животните:
“Нам не ни останува друго од тоа да заклучиме дека живееме во една морничава, гротескна, девијантна средина, и дека заостануваме во секој поглед зад секоја нормална, хумана и цивилизирана земја. Да заклучиме дека на ниту едно ниво не се пласира и негува хуманоста; дека од страна на институциите ниту се превенира, a уште помалку санкционира самоволието и суровоста на која се изложени животните. Прашуваме зошто се казнуваат граѓани за неносење на пудлица на поводник, но ако се изживуваат врз животните, тогаш не се предмет на интерес на институциите!
Информираме дека, од причина што не веруваме дека во Македонија, во однос на животните нешто ќе се промени без притисок, овие фотографии и ред други материјали кои ги располагаме ќе бидат доставени до сите меѓународни субјекти и институции во Европската Унија кои го сметаме за релевантни и веруваме дека можат да помогнат .
Веруваме дека ќе сакаат да не поддржат многумина, затоа што ова што кај нас се слушува и амнестира од одговорност е шокантно за секој кој има здрав разум и елементарна човечност”, вели здружението.