Здружението за заштита на животните „Анима Мунди“ (АМ) го отвори првиот Центар за хуманост и борба против насилството врз животните во Република Македонија.
– Во услови кога насилството врз животните е сеприсутно во нашето општество преку Центарот ќе се обидеме да влијаеме на јавната свест и промовираме хуманост, но и да обезбедиме конкретни услуги за превенција/евиденција /санкција на насилството врз животните, кое, доколку не се перципира и третира со сериозност, ескалира во сите сфери во нашето општество и го деградира нашето живеење, велат од АМ.
Центарот ќе промовира хуманост, правда и права на животните, ќе обезбеди услови за комуникација, координација и мобилизација на граѓани, волонтери и активисти. Ќе врши превенција и евиденција на случаи на насилство врз животните, ќе посредува правно во сите случаи на насилство врз животните со цел сторителите да бидат најстрого санкционирани и ќе соработува со институциите и дејствува во насока да се обезбеди силна законска рама која ќе ги штити животните во Република Македонија.
Центарот е лоциран во ТЦ Бисер (на први кат), и е овозможен благодарение на програмата Цивика мобилитас , проект на Швајцарската агенција за развој и соработка (SDC), кој го спроведуваат NIRAS од Данска, Македонскиот центар за меѓународна соработка (МЦМС) од Македонија и Шведскиот институт за јавна администрација (SIPU) од Шведска.
За секое прашање, граѓаните можат да се обратат на телефоните: 077 487 253 и 077 487 255.