Непознати сторители ноќеска целосно ја искршиле спомен плочата на Мара Бунева, на кејот на Вардар во Скопје, што вчера ја поставија претставници на неколку бугарски здруженија.
Од она што го забележа камерата на НОВА, може да се види дека нема ниту трага од новата плоча која што ја поставија почитувачите на ликот и делото на Мара Бунева. На местото има остатоци само од старата плоча, а цвеќето и венците се расфрани по кејот на Вардар.
Граѓаните со поделени мислења за вандализмот кој се случил ноќеска.
-Секој што крши е варварин, не подржувам ниту еден вид ванадализам, ова е наша жена од Тетово е, изјави граѓанин пред камерата на НОВА.
-Не треба да се урива но, овој споменик не е поставен од нашата држава, рече друг граѓанин.
Во организација на Бугарскиот културен клуб, вчера во црквата Св. Димитрија во Скопје се одржа панихида за Мара Бунева, а потоа на кејот на реката Вардар беше поставена нова спомен плоча.
На 13. јануари се навршуваат 86 години од атентатот што го извршила Мара Бунева врз српскиот државен обвинител Велимир Прелиќ во центарот на Скопје. Откако го извршила атентатот, таа се самоубила.