Големо мнозинство од граѓаните имаат позитивно мислење за Претседателот Ѓорге Иванов, а речиси две третини од испитаниците сметаат дека шефот на државата чесно ја извршува својата должност, покажуваат во сабота објавените резултати од испитувањето на јавното мнение што за потребите на Кабинетот на Претседателот на Република Македонија го спроведе Институтот за Политички Истражувања од Скопје (ИПИС).
Според резултатите, на прашањето „Какво е вашето мислење за Претседателот на Република Македонија, Ѓорге Иванов?”, дури 59,1 отсто се изјасниле позитивно, 23.8 имале негативно мислење, додека, пак, 17.1 проценти одговориле со не знам или немале договор.
Притоа, од компаративните податоци се забележува дека кон средината на јуни оваа 2013 година, позитивното мислење за работата на Иванов кај избирачите е најголемо во изминатиот период од 2010 година наваму.
И, соодветно, негативното мислење за Претседателот е на најниско ниво. Така, во октомври 2010 година, позитивно мислење за Претседателот Иванов имале 45,7 отсто, во декември 2010-та – 47, во мај 2011-та – 49,3, во септември 2011-та – веќе довербата во Иванов се зголемува над 50 проценти и изнесува 53,4 отсто, а нагорниот тренд продолжува и во март 2012 кога довербата во Иванов ја имаат 54,7 отсто, во октомври минатата 2012 година изнесува 58,4 отсто за по половина година да изнесува сегашните 59,1 отсто.
Од друга страна, негативната перцепција на граѓаните за работата на Претседателот Иванов почнувајќи од октомври 2010 година кога за речиси нецел процент е помала од позитивната 44,8 наспроти 45,7 отсто, постојано се намалува и ги бележи следните параметри: 42,3 во декември 2010, 36,7 отсто во мај 2011-та, 28,1 проценти во септември 2011-та, по што доаѓа до мало зголемува во март 2012 година од 30,6 отсто, поп што следува драстичен пад на 23,2 отсто во октомври 2012 година до сегашните 23,8 отсто „недоверба” за активностите на Претседателот Иванов.
Во однос, пак, на прашањето „Дали сметате дека Претседателот Иванов чесно ја извршува својата функција?” огромни 73,6 отсто одговориле позитивно, 14,3 проценти одговориле негативно, а 12,1 отсто немале одговор или одговориле со „не знам”.
Анкетата е спроведена во периодот меѓу 14-ти и 17-ти јуни 2013 година, од страна Институтот за политички истражувања од Скопје (ИПИС), преку телефонска анкета на репрезентативен примерок од 1.119 испитаници е во рамките на редовните мерења на ставовите на граѓаните во однос на нивната доверба и перцепции за работата на Претседателот на Република Македонија.